Jeugdpreenses & Landhieër vanne Schäöpkes

De nowwe landhieër vanne Schäöpkes 2019: Ron I
 

Ônger groeëte belangstelling és op zaoterdig 19 jannewarie 2019 de nowwe Landhieër 2019 van V.V. de Schäöpkes in ’t Groenewoud uutgerope.

 

’T és Ron l Klaassen, 50 jaor, zoeën van Wim Klaassen en Maria Klaassen-Rompa. Getrawdj mét Marieke De Kwaadsteniet-Klaassen. Gruuëtse vader van twieë wichter, Luuk en Sjors.
Same woeëne ze oppe Remundjsewieëg 50a.

 

In ’t daagliks laeve wêrkzaam beej Reijngoud Adviesgroep in Geldrop as miljeu-adviseur vör aafval- en chemische bedrieëve.
Zien hobbies zeen de jeugd trainen beej SV Laor, ‘n squashbel’ke hâwe en op ziene tiêd ‘n Bels beerke dreenke.

 

Same met zien Adjedânten Huub, Astrid, Ruud en Willion gieët hae de Vastelaovendj vuuër ônger zien devies: “Met völ meziek en tamtam in ‘n good miljeu, weurtj nemes de vastelaovendj oeëts beu”.

Umdet de Landhieër inne miljeubranche werrektj en in ziene vreeje tiêd vól klusj, hieët hae de “Orde van ’t Miljeu-klusserke”  ingesteldj.

 

De Landhieër wînsj edereîn ‘ne geweldjige vastelaovendj met völ lôl en plezeer!!


De nowwe Jeugdpreenses vanne Schäöpkes 2019: Jamie I

In ’t Groenewoud és op zaoterdig 19 jannewarie op ‘t Lemkesbâl de nowwe Jeugdpreenses van V.V. De Schäöpkes uutgeroope. ’t Es de 10 jaorige Jamie Dankers, dochter van Danny en Edny Dankers-Wacanno. Same met zien Vader, mooder, hoônd Gizmo en poeze Aila en Maila woeëntj ’t aanne Johanna van Meursstraat. Jamie hieëf ’n zöster Melissa en twieë breurs Brantley en Laurens

 

Jamie es lieërling in groep 6 aanne Baazisschoeël “Aan de Bron. Naeve Vastelaovundj gieët ’t gaer paerdri-jje beej Manege Laor en Team Verheyen. Mer zien allergroeëtste hobbie es dânse beej Fresh. Daorum hieëf ‘t de “Orde van ’t Swingendj Perdje” ingesteltj. Zien adjudântes di-j um met dieës drökke dage beej zulle staon zeen:

zien nichtje Edney Wacanno en vriendinneke Lotte Melnik

 

Same zulle ze de Jeugd in ’t Groenewoud vuuërgaon ônger zien devies:

 

‘Vör os gein streetdance en ’t perdje op stâl

 Want vae gaon swinge op eeder Vastelaovundj bâl’

 

Jeugdpreenses Jamie I weênsj eederein “unne gooje Vastelaovundj”