Oeës Hoeëghede
Beste Vastelaovundjvierders van Wieërt en in ’t bezundjer, minse van ’t Groenewoud.
Weem haaj det noow verwachtj det dit ” Blusmênke “ de Landhieër van 2012 in 't Groenewoud zoeëj waere. Ich woor zellefs zier verrasj toen Cor mich beldje.
Ich wil mich noow gaer efkes aan uch allemaol vuuërstelle:
Ich bin Karl-Heinz Kwakman, zoeën van Jac van Driena van Raps Kloote Kuub en van Annie van Hendrikke Dieneke.
Ich bin 41 jaor en woeën al 17 jaor same met Karin Leeuwen, woeë ich ôngertösse bekans 4 jaor met getrouwdj bin. Vae woeëne oppe Magdalenastraot 22, woeë 't mêrrege zieëker kei-jsjiek versieërtj zal zeen.
Ich bin de gruuëtse vaâder van drei-j wichter, Robbin van 19, Luc van 14 en Sharon van 12 jaor.
Geboeëre bin ich oppe Nazarethstieëg inne Stad en opgegruutj bin ich oppe Anna van Burenstraot op Moesel. Sinds afgeloupe jaor bin ich, same met mien Karin, aspirântlid van V.V. De Schäöpkes en vanaaf vandaag zeen ve offiesjeel lid vanne vereiniging.
Ich wêrrik beej “Trespa International BV” aanne Wetering in Wieërt, woeë ich as operator de dekste tiêt aan pörs 3 of pörs 7 staon.
Mien hobbie is mien wêrrik beej de vreejwillige brandwieër van Wieërt, woeë ich, same met de minse van mien ploog prebier, Wieërt en umstreke te hellupe as 't erges mis gieët, met ‘n aanreej-ing of unne fik.
Auch beej Trespa bin ich lid vanne bedrieëfsbrandwieër.
Dae Vastelaovundj allein doeërgaon det es haost neet te doon en daorum heb ich twieë Adjudânte gezochtj um mich te hellupe met di-j daag.
Ich zal ze noow aan uch vuuërstelle:
Mieëne ieërste Adjudânt es mieëne beste kammeraot en schoeënbroor, Edwin Leeuwen, dae net as ich lid es van V.V. De Schäöpkes en oppe Limburglaan woeëntj. Hae es trouwes weer vreejgezel, dus dames as dejje nog op zeuk zeetj,
’t tillefoonnummer…………….. is altiêt beej mich op te vraoge!
Mieëne twieëdje Adjudânt es mien schoeënvader Wop Leeuwen, dae getrouwtj es met Rie Steur. Same woeëne di-j oppe Margrietlaan umme hook beej 't Buurthoês vanne Vêrkusköp.
Ich haaj heej gaer mieëne derdje Adjudânt beej gehadj staon, mer dae mos, tot zieëne groeëte spiêt besloeëte, um neet mej te doon met os. Toch wil ich Hans Stokbroeks beej dieëze nog us laote wieëte det ich 't begrieëp en det vae 't waardieëre det Hans os oppe achtergroond zoeë völ wilt hêllepe.....kaerel unne dikke merci van os allemaol!
Umdet ich gaer met mien hobbie, de brandwieër, bezig bin, heb ich de
“Orde van 't Blusmenke”ingesteltj en mien devies met dieëze Vastelaovudj es
”Met dieës daag vör mich gein wêrrek of fik,
't Es Vastelaovundj woeë ich op kick!”
In ’t Groenewoud es zoôndig 15 jannewarie op ‘t Lemkesbâl in ‘n gezellig en sfeervôl Gemeinschapshoês Groenewoud de nowwe Jeugdpreens van V.V. De Schäöpkes uutgeroope.
‘t Es de 10 jaorige Jesse Keijers, zoeën van Pascal Keijers en Diana Volman, same met zien aojers, breurke Yordi en zösterke Fenne woeëntj hae aanne Loonstraot. Hae es lieërling aanne Basisschool “Aan de Bron” in ’t Groenewoud.
Jesse deut gaer ‘free-running’ en taofeltennis beej taofeltennisvereiniging ‘Megacles’. Daorum hieët Jeugdpreens Jesse I ouch de “Orde Van ’t Plênkske” ingesteltj.
Neteurlik kin hae dit allemaol neet allein en hieëf hae twieë kammeräötjes Geert-Jan Knapen en Kevin Knapen gevraogdj as zien Adjudânten.
Same zullen ze de Jeugd in ’t Groenewoud vuur gaon ônger zien devies:
“Free-running doon ich normaal ’t leefst en mieëst,
Mer noow bin ich heej en veere vae fieëst”
Hae weensj eederein “unne gooje Vastelaovundj”.
Foto's | Jac Vanderfeesten