|
Histories oeëverzicht van vv.de Schäöpkes
Vör de oprichting van de ”Schäöpkes” motte vae in feite trök gaon nao november 1962
Ut Groenewoud waas toen nog un jong wijk en ut gevaor dét de wijk in buuërtschappen oet ein zoej valle waas zieëker neet deënkbeeldjig.
Un toendertieëd gehaoje Ceciliafieëst van ut kerkelök zângkoeër waas un geweldjig succes en mede op initiatief van de toenmaalige Pèstoeër van Hees wuuëtj toen ut idee geopperdj um zoeë wat eeder jaor te doon . Eeder jaor un groeët fieëst woeë op alle Groenewouders beej elkaar koste kaome.
Vree snel wuuëtj d’r besloeërte um ’t ein en ânger in de vastelaovuntj sfeer te doon plaats veenge
Dan zeën de minse mieër oetgelaote, en wuuërtj d’r eerder unne bând gesmieëdj.
Zoeë gezachtj zoeë gedaon. Diverze pêrsoeëne waerdje benaderdj, en al op 23 november gînge ze offiesjeel van start as vastelaovuntj vöreiniging ”de Dorstige Schapen” en wuuërtj Sef Fiddelers op ut ieërste Schäöpkesbâl, in zaal Rofesta oppe Beest oetgeroope as Landhieër 1963.
Nao un sèzoen te hebbe ”gedreidj” voonge ze um allerlei ree-je toch baeter um de naam te wijzige in
”de Schäöpkes” en zoeë heite vae nog altieëd
Wi-j Kaome vae aan de naam Schäöpkes ?
Op de ieërste plaats ès de parochiekerk van ’t Groenewoud tôw gewiedj aan De Goede Herder.
En aangezeën de toenmalige Pèstoeër van Hees ein van de initiatiefnemers van de vastelaovuntj vöreiniging waas, wuuërtj hem as hoeëgste gezagsdrager in oeës wijk de ieëre-titel van Opper Herder töwbedeiltj, en zoeë ès de naam ”de Schäöpkes” ontstânge.
Wijk Vastelaovuntj vöreiniging.
Angers dan de optochtvöreiniginge is vv.de Schäöpkes un echte wijk vastelaovuntjvöreiniging
D’r wuuërtj jaorluks diverze vastelaovuntj activiteiten vör de wijk georgenezieërdj mèt as hoeëgte punt ut Schäöpkesbâl en de oetroöping van de nöwe hieërser oeëver de wijk Groenewoud,
de Landhieër.
Landhieër ès unne ângere naam vör Preens, en umdet vae os op de ieërste plaats Rogstaekers veûle en de Rogstaekers Preens als Prens vör hieël Wieërt beschouwe, ès dét de rede dét vae gekoeëze hebbe vör de naam Landhieër. Auch hebbe vae geine Vorst mèr unne Vuuërzitter.
As wijk vastelaovuntj vöreiniging Veënge vae dét vae de taak hebbe um de mînse vuuëraaf al un bitje op te wêrme vör de groeëte vastelaovuntj veering, en doeër oeës aktiviteite prèbieëre vae de vörstândhaojing in oeës wijk te bevordere.
De begin jaore
Zoeë as ieërder beschrêve werd ut ieërste Schäöpkesbâl gehaoje oppe Beest. Ut jaor d’r op gînge ze vanwege de enorme töwloup nao ’t st.Joëzefsgebouw aan de Wilhelminasingel, dao liktj noow
Albert Hein. In de begin jaore wuuërtj de Landhieër beej gestânge doeër ”Houtvésters” en ”vörsierdj”
mét un ”Freule” deej as adjudânt fungieërdje. In dae tieëd waare auch de bekîndje ”Zittinge” met tal van bekîndje artiesten o.a. Pierre Cnoups, Ton Jorna, e.a. De hofkèpel van de Zweeloeëre onger leiding van Sis de Kapper zorgdje vör de muziek, en ut waas duuëdelök dét de vastelaovuntj laefdje in zoewaal ’t Groenewoud as auch in hieël Wieërt, want eedere kieër waas de zaal tot de léste plaats bezatte. Um auch aan de nuuëdige finansieje te kaome vör de ieërste deilname aan de optocht inne stad wuuërtj in 1967 i.s.m. de Wieëter hérmeni-je st.Joëzef en st.Antoenius un geldj inzamelings aksie gehaoje in ’t Groenewoud. Mèt dit beej-eingebrachtj bedraag bouwdje ze aan het motto:
”Hieël De Wêrreldj Veertj Vastelaovuntj”
Dét ze d’r toendertieëd groot op gînge um as aktieve vöreiniging te waere aangemerktj blieëk oet ’t vörzeuk van de toenmalige vuuërzitter, um neemus minder dan de Mènister van Boeëtelanse Zake
Mr. Joseph Luns oet te nuuëje vör de ”Zitting” echter de mènister most aafzegke weeges vörplichtige érges ângers.
In de jaore ’66 en ’67 wuuërtj d’r rond 11 november ”Buuëte-redeners” aovundje gehaoje in ut st.Joëzefsgebouw, en di-j blieëke ’n groeët succes te zeën. In der zeventjiger jaore moeste ze noodgedwônge, i.v.m . ’t aafbraeke van ’t st.Joëzefsgebouw vörhoeze nao zaal ”Everaers” aan de Rèmunsjewieëg. De ruumdje waas neet groeët mér doeër minder groeëte aktiviteite waas dit auch neet mieër zoeë noeëdig.
In ’t jaor 1973 wuuërtj ‘t 11 jaorig bestaon geveerdj mèt vör dae tieëd un groeëte rèsepsie en as Jubileum-Landhieër werd gekoeëze Cor van den Bosch.
In 1975 wuuërtj d’r weer vörhoêsdj, en noôw belandje de vöreiniging in de Apollozaal inne Bieëkstraot. Weer waare ze op dieës oeveriges zieër gastvreeje lokasie verder aaf van de wijk Groenewoud, mér toch blieëve de vaste bezeukers trouw in groeëte getale de aktiviteite bezeuke.
Toch blieëf ’t bestuuër naarstig nao un lokasie zuuëke di-j dichter bi-j ”hoeës” gelaege waas.
Ze Voonge de oplossing in 1978 in café zaal ’t Groenewoud gelaege aan de grens van de wijk.
In 1981 waere d’r vreendschapsbanden aangekneuptj mèt de Belze vöreiniging ”de Papbugels” oet Bocholt en tot heden wuuërtj deeze eeder jaor oeëver en weer aangehaald ônger ’t genot van unne gooien pot Belz of Limburgs gerstenaat.
De Tachtjiger Jaore
Dieës jaor blieëke in ut allerlei opzichte roerige jaore te waere.
In 1983 wuuërtj ut gemeinschapshoeës ”Groenewoud” aan de Kesselstraot gerealizierdj, en weer wuuërtj de vörhoëswaage bestéldj. Hoeëpelök vör de léste kieër, want op un eige home centraal in de wijk wachdje vae al jaore.
1984 zal ingaon as un bezeundjer jaor, want in ’t nôw home wuuërtj mèt Lanhieër Wim Hendriks aan ’t hoeëft ônger groeëte belanstèlling ut twieë maol Elf jaor bestaonsfieëst geveerdj. Oeëver belangstelling haaje ze neet te klaage want nao eenkele oore resepsie blieëk dét ’t gebouw nöw al te klein waas. Vör ’t ieërst wuuërtj d’r in de pèrochiekerk un Dialect-Mês geveerdj, genaamdj
”Booere Keele Mês” en tot op heden és d’r eeder jaor nog zoeë un veering ongerleiding van oeëze ”Opperherder”. Auch kîndje de vöreiniging diverze aksies di-j haard noodig waare um de kas te spekke. Zoeë wuuërt d’r hoeës aan hoeës appels vörkocht, woeëre d’r Vloeëje-mêrendje orgenezierdje en un zaalvoetbaltoernooi, en wuuërtj d’r eenkele jaore de bekîndje kéfee-voetbal toernooien gehaoje. Auch vörschieëntj d’r sinds 1982 eeder jaor un programmabökske dét gehieël gratis in de wijk wuuërtj bezörgdj.
Vörschillende pèrsoeëne hebbe in de loup der jaore de vöreiniging as Vuuërzitter geleidj, mér
dhr. Bert Minkels waas toch de pèrsoon dae de vöreiniging un eige gezicht gegaeve hieët in de ruûm 14 jaor van zieën Vuuërzitterschap. Onger ziên bezielendje leiding waere d’r diverze aksies vör de parochiekêrk gehaoje. Zoeë zatte vae os in vör geldj beej-ein te breenge vör de repèrasie van ut Kêrdaak, vör de aanschaf van un Löwklok en waare vae aktief bi-j ut zilvere bestaonsfieëst van de pèrochie in 1987. Vae waare de initiatiefneemers van de in 1989 en 1990 gehaoje kien-aovundje vör de renovasie vanne körststâl.
Medio 1988 broeëke d’r vör zoeë good laopndje vöreiniging zwaor ti-je aan. Nao eenkele meiningsvörschille troeë-j ut bestuuër aaf , en haokdje d’r auch eenkele leede aaf.
Vlak vuuër de vastelaovuntj 1989 waere de hang inein geslaage en in sterk aafgeslânkdje vorm wuuërtj d’r toch un waardig vastelaovuntjfieëst geveerdj.
De Nuuëgentjiger Jaore
Begeën 1990 wuuërtj d’r un nöw bestuuër gekoeëze, en d’r wuuërtj besloeëte um as offisi-jeele vöreiniging doeër te gaon. Statuute waere bekrachtigdj en vae waere lid van de Kamer van Koophandel. Auch gîinge vae beej de boönd van Carnavalsverenigingen in Limburg de BCL.
Auch op sosiaal vlak waare vae weer aktief , vae bedachte un steîn-aksie vör ut Credo-zaelke beej de kerk. In 1990 deeje vae vör de léste kieër, nao 24 jaor te hebbe mei-j gedaon mei-j aan de Rogstaekersoptocht. Gebrek aan mankracht en bouwruûmdje laoge heej aan ten grondslaag.
Dét de vöreiniging auch trouwe leede waardieërtj blieëk in 1991 toen de vöreiniging twieë pèrsoeëne beneumdje as Ieëre lid van vv.de Schäöpkes t.w. de hieëre Cor van den Bosch en Arno Smeets.
Toch kwaom d’r in 1991 unne schaduw oeëver de vastelaovuntj veering doeërdét de vastelaovuntj wuuërtj aafgelasj vanwieëge de hieërsendje Golf-oeërlog in ’t Midde Oeëste.
Doeër dieës aafgelasting haaj de hieërsendje Landhieër Math v.Heur waal de primeur um twiee kieër Landhieër te zeen. Dét de vöreiniging de léste jaore duuëdelök in de lift zitj blieëktj oet de oeëverweldjegendje belangstèlling bi-j oeës aktievieteite. Al acht jaor orgenezieëre ze in saamewerking mèt Polleke en Wullemke ut BlaosSpektaakel vör Boore hermeniekes en Joekskêpelle mèt deilnaame oet hieël Limburg, jao zelfs oet Rèmundj. Heej kunne vae zieëker spraeke van un geweldjig sukses. Sukses haaje vae auch op de vuuëraovuntj van kuûninginnedaag 1994 toen vae in de Port van Limburg vör de ieërste kieër un OranjeBâl heële mèt artieste as Beppie Kraft ,
Duujo Difference, en de Joekspêpel Kappesmoos. De opbrîngste van dieëze aovuntj waare bestumdj vör de aanschaf van nôw Steeke, di-j vae vör ut ieërst op ‘t 33 jaor jubileumfieëst aan ut publiek zulle toeëne.
Saamewèrking
In de loup d’r jaore hieët de vöreiniging unne gooje bând opgebouwdj mèt de diverse vöreiniginge en instansies oet de wijk.
Zoeë orgenesieërdje vae saame mèt Stingting Vrije Jeugd en vv. de Lieëg-gêngers jaorlöks op vastelaovuntj dieënsdig de Hosmêrrege vör de pupille van ut daagvörblieëf ”ut Zonnehoeës” dét in de wijk és gevestigdj, en auch de ”Wichteroptocht” van de J.F.Kennedyschoeël wuuërtj eeder jaor opgeloeësterdj doeër heej aan mei-j deil te neëme. Mide in de 80-er jaore waere de Schäöpkes muziekaal begeleidj doeër Kêpel ”Eige Wiês” en vanaaf 1991 vörgezeldje eenkele jaore Kêpel
”de Schoeëwaer Blaozers de vöreiniging op un passendje wieëze. Zieër gooi-j contacten haaje vae auch mèt Stichting Gemeinschapshoeës Groenewoud, en vae zeen dan auch ’t bestuuër zieër erkîntelök vör de in de laup d’r jaore ontstânge prettige saamewerking. Bèkans zônger oetzôngering zeen de Landhieëre vanne Schäöpkes trök op unne tieëd dae ze neet gaer haaje wille misse. Nog gaer vörtelle ze oeëver eur belaevenisse en wannieër vae ze motte geluîve, waas ut jaor dét ze Landhieër waare, ut béste vastelaovuntj’s jaot tot noôw tôw. Mèschien liktj dao de reede vör de oprichting van de Aod Landhieëre Klub eenkele jaore trök. Ongetwieëfeldj zulle op de aovundje deej ze haoje nog völ annekdotus al dan neet op waorheid berustdje belaevenisse vörtèldj waere.
Indj nuuëgentjiger jaore begin 2000
D’r waas weer storm op komst, ut woeër ein kaome en gaon van leede vanne Schäöpkes. Dao doeër kwoom d’r twieë-spalt in de vöreiniging, en de helft van de leede goof d’r de brui aan. Gooje raod waas deur. Nao un good gesprek werd d’r unne doeërstart gemaaktj, mér ’t jaor d’r op waas ut weer mis. Zoeë erg zelfs dét d’r in ’t Groenewoud sprake waas van geine vastelaovuntj. De in allerijl
beej-ein geroope Aod Landhieëre Klub woeëre ut vlot eins, ut most doeërgaon.
De tieëd waas te kort vör unne nôwe Landhieër daorum woert d’r un Aod Landhieëre-Bâl gehaoje.
Völ positieve reaksies van zöstervöreiniginge waas de aanzet tot ut rustig gaon opbouwe van wat nöws. Op kêrmus dieënsdig troffe zich toevallig unne Aod Landhieër en un paar fannetieke vastelaovuntj veerders van ut Groenewoud zich beej kêfee ut Slachthoeës. En werd d’r oeëver de vastelaovuntj in ut Groenewoud gekaltj. S’angerdaags werd d’r direkt aksie öngernoeëme en nog un paar ânger mînse beej gehaald. Oet alle geledinge van ut Groenewoud werde mînse gezochtj di-j zitting wildje neeme in de nöw te vorme stuurgroep. Aan de nog drei nog zittendje leede van de Schäöpkeds werd oetgelachtj wi-j vae in de tôwkomst verder zulle gaon. D’r werd un nôw bestuuër en werkgroeëpe gevormd.
Vae haaje €0,00 oppe bank twieë soeërte aoj steeke vör de Raod van Elf un paar vöreinigingsmedailles. Vör de Landhieër geine septer en mantel, de mantel krieëge vae in broeëklien beej Leike Soudant. Mér waal mînse deej verder wildje mét de vastelaovuntj in ut Groenewoud, en dét waas ut vörnaamste Dét dit good aansloôg werd bewaarheidj toen in de Schäöpkes in 2004 de Wichtervastelaovuntj oeëver noeëme van Stichting Vrije Jeugd Groenewoud deej völ vörtrouwe haaje in de nöw vöreiniging . Dao doeër wuuërtj de hieële vastelaovuntj in ut Groenewoud in ein vöreiniging saame gevoegdj. Dit resultieërdj in de vöreiniging deej d’r op dit momént stieëd.
Un vöreiniging di-j wiltj prèbieëre um de vastelaovuntj in ut Groenewoud oet te draage en te stimelieëre, mèt eur steun en mei-jwerking zal dét zieëkert lokke.
Tot slot
Auch hebbe vae hieël völ te dânke aan ‘t groeët aantal Sponsers, advörtieërders en begunstigers di-j ut muuëgelök maake dét de vöreiniging eeder jaor weer vör de Groenewoudse mînse un aantrekkelök programma kunne presentieëre. Vae spraeke dan auch de weëns oet, de de mînse van ’t Groenewoud, en zieëker de buuërtvöreiniginge deej in de wijk zeën ontstânge, de Schäöpkes zulle stuuëne doeër aktief deil te neeme aan de vastelaovuntj aktiviteite zoeë dét ut streeve van vv. de Schäöpkes um de vörstândhao-jing in de wijk te bevordere op un gezellige en ongedwoonge wieëze in de loup d’r jaore nog mieër gestalte zal krieëge. |
